پاکستان نے چین میں جاری پہلی ایشین چیمپئنز ٹرافی ہا کی ٹورنامنٹ کے فائنل کے لیے کوالیفائی کر لیا ہے۔ جمعہ کو کھیلے جانے ایک اہم میچ میں روایتی حریف پاکستان اور بھارت کا مقابلہ دو دوگول سے برابر رہا۔ میچ برابر ہونے کے باوجود پاکستان نے دس پوائنٹس کے ساتھ فائنل کیلئے کوالیفائی کرلیا ہے۔ دونوں ٹیموں نےمیچ کے پہلے ہاف میں گول کرنے کی متعدد کوششیں کیں لیکن کوئی بھی گیند کوجال میں نہ پہنچا سکا۔ کھیل کے دوسرے ہاف کے آغازمیں پاکستان کے وقاص شریف نےگول کر کے اپنی ٹیم کو برتری دلائی لیکن بھارت نے جلد ہی گول کرکے اس برتری کا خاتمہ کردیا۔ پاکستان کی جانب سے محمد عرفان نے دوسرے ہاف کے چوون ویں منٹ میں دوسرا گول کرکے اپنی ٹیم کو دو ایک کی سبقت دلا دی تاہم بھارت نے مقررہ وقت ختم ہونے سے پہلے گول کر کے مقابلہ برابر کر دیا۔