Home / PSL / Pakistan super league, kis team mein kitna dam?

Pakistan super league, kis team mein kitna dam?

Pakistan super league key dosray season ka aaghaz hochuka hai. Is league mein pehlay season ki terhan Pakistani aur ghair mulki khilari shareek hain taham is martaba teen ghair mulki khiladion Derren Sammy , Brendon Mccullum aur Kumar Sangakara ko apni teamon ki captani bhi sonpi gayi hai.

Islamabad United

Islamabad United Pakistan super league ki di’fai Champion team hai.
United key malkaan ney is saal unhi khilarion pur’at’mad zahir kiya hai jinhon ney guzashta saal final mein Quetta Gladiators ko c6 wickets se shikast dey kar title jeeta tha, Al’batta unhein west indies key Andrey Russel ki kami shiddat se mehsoos ho gi jin par Anti-Doping Tribunal ney ek sala pabandi aa’ed kar di hai.

Andrey Russel pehli Pakistan super league mein sab se ziyada 16 wickets haasil karney walay bowler the. Un ki jagah England key fast bowler Steven Finn ko squad mein shaamil kiya gaya hai.Islamabad United key captain Misbah Al Haq hain jo agarchay bain al aqwami OneDay aur T20 cricket ko khairbaad keh chukey hain lekin mehdood overs ki cricket ki barikion ko samajte howe is waqt bhi T20 format mein kisi bhi mazboot bowling par haawi honay ki bharpoor salahiyat rakhtay hain.Islamabad ki batting line mein Misbah Al Haq key elawa Sherjil Khan , Shane Watson, Brad haddin, Dwayne Smith, aur Khalid lateef jaisay jare hana batsman mujood hain.United ki bowling line Mohammad Sami, Samuel Badree, Imran Khalid aur Mohammad Irfan par mushtamil hai. Off spinner Saeed Ajmal international cricket mein wapsi ki umeeden liye Islamabad United mein shaamil hain.

Quetta Gladiators

Sarfraz Ahmed ki qayadat mein Quetta Gladiators ko Keven Peterson, Luke Wright, Ahmed Shahzad ki khidmaat haasil hain.
Guzashta saal Quetta ki taraf se Ahmed Shahzad 2 nisf centuries ki madad se sab se ziyada 290 runs bananay walay batsman the. Lekin Keven Peterson sameit deegar batsman bujhe bujhe se rahay they aur koi bhi batsman ek se zaa’ed nisf century score nahi kersaka tha.

Mohammad Nawaz bowling mein 13 wickets key sath qabil zikar rahay they. Is baar bhi woh Umer gull, Anwar Ali aur ba-salahiyat Meer Hamza key sath team ka hissa hain.

Quetta ney Carlos Brathwaite ki jagah Moeen Ali ko team mein shaamil kiya lekin unhon ney omrey ki adaigi ki wajah se moazrat karli jis key baad Brad Hogg ko team mein shaamil kiya gaya lekin unhon ney bhi zaati wajohaat ki bina par khailnay se moazrat karli aur ab Quetta ney Bangladeshi all rounder Mahmood Allah ko team mein shaamil karney ka elaan kiya hai.

Srilanka ke Thisara Perera bhi team mein shaamil hain aur october ki draftinh mein shaamil nah kiye jaane walay Nathan Mccullum ko bhi dobarah team mein jagah di gayi hai.
Afghanistan ke Mohammad nabi Afghanistan aur Zimbabwe ki series ki wajah se is baar super league mein shaamil nahi hain.

Peshawar Zalmi

Shahid afridi agarchay ab international cricket ka hissa nahi rahay lekin is key bawajood woh Pakistan super league mein shaiqeen ki bharpoor tavajja ka markaz hain.

Peshawar Zalmi ko Shakib Al Hasan , Alex Hales aur Mohammad Shahzad ki khidmaat haasil nahi hain.

England key one day captain Eoin Morgan aur Bangladesh key Tamim Iqbal bhi pooray tournament key liye dastiyab nahi hon gey. Peshawar Zalmi ney is kami ko Marlon Samuels Andre Fletcher aur Tillakaratne Dilshan se poora karney ki koshish ki hai.

Bowling mein Hasan Ali ka talent jo guzashta saal ishi Pakistan super league se samnay aaya tha Pakistani team key sath England aur Australia key doray kar key kaafi tajurbah haasil kar chukey hain.

Guzashta tournament mein 15 wickten haasil karney walay Wahab Riaz aur left arm spinner Mohammad Asghar se bhi Peshawar Zalmi barri umeeden lagaye howey hai.

Karachi Kings

Karachi kings ki qayadat is baar Sangakara ke supurd ki gayi hai jo guzashta saal Quetta Gladiators ki taraf se chand matches khailay they.
Un key elawa Lahore qalandar ki taraf se khailnay walay Chris Gayle bhi Karachi kings mein shaamil hain. Babar Azam ka talent bhi Karachi ke paas hoga. Shoiab Malik aur Ravi Bopara key tajurbay se faida uthany ki umeeden bhi Karachi ney qa’im kar rakhi hain.

Bowling mein Mohammad Aamir , Emad Waseem aur Sohail Khan front line bowlers key torr par dikhayi detey hain.

Lahore Qalandar

Guzashta saal sirf do match jeet kar 5 teams mein sab se aakhri number par anay wali Lahore qalandar ki team ney is baar test cricket ki taiz tareen century bananay walay Brendon Mccullum ko apne squad mein shaamil kiya hai.

Yahi nahi balkay Azhar Ali ki jagah unhein team ki qayadat ki zim’me daari bhi sonp di gayi hai.

Lahore qalandar guzashta saal sab se ziyada 335 runs bananay walay Umar Akmal aur Jason Roy ki madad se is baar qismat badalny ki koshish kere gi.

Bowling guzashta saal Lahore qalandar ka sab se bara masla rahi thi is baar is ney Sunil Narine, Grant Elliott aur Sohail Tanveer ko shaamil kiya hai.
Elliott guzashta saal Quetta ki taraf sey khailtay howey 11 wickets haasil karney mein kamiyaab rahay the.

Comments

comments

Check Also

Peshawer Zalmi win 2017 pakistan super League

Peshawer Zalmi win 2017 pakistan super League

Peshawar Zalmi the winner of the Super League to Pakistan: Peshawer Zalmi win 2017 pakistan …