امریکا کے سابق صدر ڈونلڈ ٹرمپ نے اسرائیلی وزیراعظم بنیامین نیتن یاہو پر سخت تنقید کے حوالے سے ایک ویڈیو شیئر کی ہے۔ یہ ویڈیو انہوں نے اپنے سوشل میڈیا پلیٹ فارم "ٹروتھ سوشل" پر پوسٹ کی، جس میں کولمبیا یونیورسٹی کے پروفیسر جیفری سیکس امریکی اور اسرائیلی پالیسیوں پر کڑی تنقید کرتے نظر آتے ہیں۔ ویڈیو میں جیفری سیکس نے انکشاف کیا کہ 2011 میں، اوباما انتظامیہ نے سی آئی اے کو بشار الاسد کی حکومت گرانے کا حکم دیا تھا، جو روس کے شام میں مداخلت سے 4 سال قبل کا واقعہ ہے۔ انہوں نے مزید کہا کہ امریکا کی عراق جنگ کے پیچھے بنیامین نیتن یاہو کا اہم کردار رہا ہے۔
جیفری سیکس کا کہنا تھا کہ 1995 سے نیتن یاہو اس نظریے پر قائم ہیں کہ حماس اور حزب اللہ جیسے گروپس کو ختم کرنے کا واحد طریقہ ان حکومتوں کا تختہ الٹنا ہے جو ان کی حمایت کرتی ہیں، جن میں عراق، شام اور ایران شامل ہیں۔ انہوں نے مزید کہا کہ نیتن یاہو آج تک امریکا کو ایران کے خلاف جنگ میں دھکیلنے کی کوشش کررہے ہیں اور ان کی پالیسیاں امریکا کو مسلسل تنازعات میں الجھاتی رہی ہیں۔ اسرائیلی میڈیا کی رپورٹس کے مطابق، پروفیسر جیفری سیکس، جو خود بھی یہودی ہیں، اکثر عوامی فورمز پر اسرائیلی پالیسیوں کے ناقد کے طور پر جانے جاتے ہیں۔ تاہم، یہ ویڈیو دراصل گزشتہ سال کی ہے، جسے اب دوبارہ زیر بحث لایا گیا ہے۔
